Ексклузивно интервју – Рајан Тедер (One Republic)

ryan tedder

Линк до Аудио Интервју-то

ПЕТАР: Не ме мрзеше и броев – турнејата Native започна на 2ри април 2013 година, според тоа концертот кој ќе го имате овде ќе биде 147-ми од вкупно 157 концерти. Според тоа, ова е една од најголемите и најдолгите турнеи било кога, само Пинк Флојд, Шер и Лејди Гага имаат направено подолги. Честитки. Колку е тешко да се одржи толку долга турнеја да биде и понатаму интересна, вкучувајќи ве и вас?

РАЈАН: Ти благодарам. Таа информација не ја знаев ниту јас. За среќа, сите ние во бендот многу сакаме да патуваме, па за нас можноста да ги пропатуваме овие места и плус во секое од нив да бидеме платени да имаме концерт беше како да сме освоиле на лотарија. Единствен начин да го одржиме ова да биде интересно и за нас е да посетиме нови места на кои или никогаш не сме биле или не сме ги посетиле многу одамна. Минатата година во декември го одржавме, она што мислевме дека ќе биде, нашиот последен концерт, но подоцна додадовме уште само 5 недели настапи на турнејата па така ќе свириме во Тел Авив, Истанбул, Кејп Таун, Будимпешта, Јоханесбург и Македонија, сите овие места се неверојатни да се посетат, кои не сме ги виделе претходно. Затоа и го направивме ова надополнување на турнејата.

ПЕТАР: Бидејќи ова ќе биде ваш прв концерт во регионот, дали ќе подготвите посебна сет листа за него? И дали ќе изведувате кавери? Слушнав за твојата последна опсесија со Hozier, дали тоа значи дека “Take me to church” пак ќе ја изведувате?

РАЈАН: Можно е да ја свириме Take me to church. Морам прво да ги прашам и другите од бендот, заедно одлучуваме околу тоа, секогаш има дебата околу тоа, но сигурно нема да се противам за Hozier. Што се однесува до сет листата, секако дека треба да биде интересна за нас, но она што не го забораваме е дека сите овие концерти се прават за да и биде забавно на публиката. Иако Native е најуспешниот албум кој сме го издале до сега и го имаат купено милиони луѓе и иако се уште ги изведуваме истите песни веќе 2 години, концертите се многу успешни. Ги ротираме песните и го правиме шоуто интересно за публиката. Можеби ќе пробаме да изведеме неколку нови песни, се зависи од тоа дали до тогаш ќе бидат готови.

ПЕТАР: Освен турнејата, што е следното големо нешто за One Republic? Се надевам дека нема да чекаме повторно 4 години за да го слушнеме наследникот на Native. 

РАЈАН: Не, никако. Веќе работиме на следниот, четврти, албум на бендот. Веќе имаме одлични песни, или барем идеи за песните. Ќе ги избереме најдобрите 9 или 10 песни од таа листа и ќе се обидеме да имаме одличен албум. Дали тоа ќе биде најдобриот албум кој сме го издале, не знам, ама ќе се обидеме да дадеме се од себе да биде така. Со сигурност ќе имаме нов сингл до крајот на годината.

ПЕТАР: Ако погледнеме 8-9 години наназад, ќе видиме дека издавачките куќи три пати го раскинуваа договорот со One Republic. Она што тогаш ве одржа во живот беше My Space. Социјалните мрежи денес, освен што им помагаат на талентираните уметници да се одржат во живот, исто така им помагаат и на неталентираните. Да се прослават, да добијат договори, да направат пари и да го трујат светот со лоша музика. Кое е твоето размислување на оваа тема и дали некако тоа можеме да го спречиме?

РАЈАН: Мислам дека она што пред малку ти го кажа е најдобриот начин тоа да се објасни. Има голем број на неталентирани луѓе на You Tube и другите социјални мрежи кои некако успеваат да преживеат со правењето на лоша музика, но штом излезеш во реалниот живот единствен начин да успееш таму е да бидеш одличен, неверојатен. Само ако си одличен можеш да го смениш сопствениот живот и животот на другите луѓе. Она што сите можат да почнат да го прават е да престанат да слушаат лоша музика и да не им помагаат на овие неталентирани луѓе да бидат успешни. Во реалноста, за да успееш надвор од You Tube треба навистина да бидеш неверојатен. Познавам многу луѓе кои почнале на You Tube и направиле многу пари, но сега нивните кариери умираат бидејки не се доволно добри. Немаат веќе толку прегледи на нивните видеа, бидејќи реалноста е дека не можеш да го одржиш на долг рок вниманието на луѓето со таков вид материјал.

ПЕТАР: Зборувајќи за технологии, луѓето околу тебе велат дека имаш специјална шифра за заклучување на телефонот бидејќи голем дел од твојот необјавен материјал, песни, се наоѓаат на него. Дали е тоа точно?

РАЈАН: Не е точно дека најголемиот дел од песните ми се на iPhone-от. Точно е дека е заклучен и имам можност доколку некој го украде да ја избришам целата содржина од него од било која локација на светот. Остатокот од тоа што го работам го чувам на други компјутери.

ПЕТАР: Билборд те прогласи за “Тајниот принц на поп музиката” и целосно се согласувам со нивното мислење. Ако погледнам на сите топ 40 песни кои ми се допаѓале во последните 5 години, ќе го најдам твоето име помеѓу авторите. Имаш работено со некои од најголемите ѕвезди во светот, но сигурно мора да постои некој со кого баш сакаш да соработуваш, за кого знаеш дека имаш одлична песна, ама тој/таа некој/а никогаше не ти се јавила. Кој би можел да биде тоа?

РАЈАН: Би сакал да работам со Paul McCartney, со Peter Gabriel, голем фан сум на Hozier, но со поголемиот дел од луѓето од индустријата со кои сакам да соработувам лесно стапувам во контакт со нив. Можам да кажам дека во однос на тоа сум среќен, работам со оние со кои сакам да работам. Им се јавувам и после кратко време сме во исто студио. Па така планирам наскоро тоа да биде Paul McCartney, со сигурност.

ПЕТАР: Во едно од своите интервјуа велиш “Не работам со пеачи под одредена старосна граница”. Зошто?

РАЈАН: Затоа што ми го губат времето и не им верувам. Но, од друга страна не би можел да кажам дека ако сум го сретнел Stevie Wonder на 13 годишна возраст дека не би работел со него. Не велам дека не постојат исклучоци за тоа правило, но 15 годишно девојче, небитно колку добро пее или колку добра песна ќе има, нема доволно животно искуство за било кој да и верува за работите за кои пее. Можам да го почитувам нејзиниот талент, но за мене тука нема друга сатисфакција освен да направам пари на тоа. А кога е само за пари, тогаш не сум заинтересиран да работам со некого.

ПЕТАР: Според тоа, ако еден изведувач треба да ги има проживеано сопствените песни – како некој кој работеше на најпродаваниот албум во последнава декада, мислам на албумот 21 на Adele, што според тебе треба да биде наративот на новите песни на Adele? Сега кога нејзиното срце веќе не е скршено и кога е среќна мајка…

РАЈАН: Можам да кажам дека таа веќе ги има снимено поголемиот дел од песните за новиот албум, но се уште треба да избере кои песни ќе се најдат на албумот за тој да биде одличен. Откако го преслушав поголемиот дел од песните можам да потврдам дека таа се уште наоѓа голема инспирација во други нешта и албумот повторно ќе биде многу успешен. Песните кои веќе ги снимила се неверојатни.

ПЕТАР: Прочитав некаде дека користиш еден фасцинантен тест со кој проверуваш дали една песна ќе биде хит без размислување, или не, и го нарекуваш “Холивудско тест возење”? Што поточно е тоа?

РАЈАН:  Не би се согласил баш дека е најточен тест кој дава беспрекорни резултати. Јас само седнувам во кола и се возам наоколу во Лос Анџелес, во одредени делови во градот и се обидувам да замислам како таа песна би звучела на радио додека си во кола. Радио станиците во Лос Анџелес се со многу голема конкуренција, веројатно најтешките на кои можеш да емитуваш песна во целата земја. Ако тие ти емитуваат песна, тоа значи дека навистина си успеал. Па ако ја пуштам песната и можам да замислам дека во исто време свири и во колата пред мене и позади мене, тогаш шансите да биде хит се големи.

ПЕТАР: По која песна би сакал да бидеш запаметен за отприлика 50 години од сега?

РАЈАН: Би сакал да го направам следниот голем Божиќен хит кој ќе стане класика.

ПЕТАР: Момците и девојките од Македонската Асоцијација на луѓе кои боледуваат од цистична фиброза дознале дека ќе го правиме ова интервју и ми испратија мејл во кој ја изразуваат својата благодарност за поддршката која One Republic им ја даде со песната и спотот за “I Lived” која беше дел од кампањата за кревањето на свеста за оваа болест во светот.

РАЈАН: Повеќето од видео спотовите за песните се себични, се користат да го рекламираат бендот и да го прикажуваат во најкул можно светло. Сакавме видеото за “I Lived” да биде најнесебичното видео кое сме го направиле, ставајќи го Брајан во центарот на приказната и неговото секојдневно победување на цистичната фиброза, што беше огромна инспирација за нас. Не се зборува многу за болеста и не многу луѓе се свесни во колку тешка состојба болеста може да ве стави. За болеста не се знае многу како за СИДА-та, ракот… па така сметавме дека е наша задача да му обрнеме внимание на светот за цистичната фиброза и дека е вистинското време за тоа. Многу сме горди на тоа. Им порачувам да не се откажуваат и да се борат, бидејќи со лековите кои се сега достапни, можеби болеста не се лекува, но се зголемува старосната граница на живот која порано била 35 години, сега е 75, што значи дека има голем напредок во медицината со кој им се помага на овие лица. Мислам дека доаѓа уште посветла иднина за луѓето кои боледуваат од оваа болест.

Интервју со Јосипа Лисац

Непоправлива идеалистка. Храбра визионерка и двигателка. Дама која одсекогаш знаела да спои многу музички стилови, публиката да ја фасцинира со она што го носи на сцена. Оригинална за уво, но оригинална и за око. Јосипа Лисац реши да го вклучи Скопје и Македонија во турнејата со која одбежува 40-години од излегувањето на нејзиниот култен албум “Дневник једне љубави”. Continue reading